પોલીસે કુલ રૂ. ૯૦૪૭૦ નો મુદ્દામાલ જપ્ત કર્યો
બનાસકાંઠા જિલ્લાના ઓગડ (થરા) તાલુકાના થરા પોલીસ સ્ટેશન વિસ્તારના વડા ગામે આવેલી સ્મશાન ભૂમિમાં જુગાર રમતા ત્રણ શખ્સોને પોલીસે ઝડપી પાડ્યા છે. આ દરોડા દરમિયાન એક આરોપી ફરાર થવામાં સફળ રહ્યો હતો. પોલીસે સ્થળ પરથી કુલ રૂ. ૯૦૪૭૦ નો મુદ્દામાલ જપ્ત કર્યો છે. થરા પોલીસ સ્ટાફ પેટ્રોલિંગમાં હતો ત્યારે તેમને વડા ગામની સ્મશાન ભૂમિમાં કેટલાક લોકો ગંજીપાના વડે પૈસાની હારજીતનો જુગાર રમી રહ્યા હોવાની બાતમી મળી હતી.આ માહિતીના આધારે, પોલીસે પંચોને સાથે રાખીને સ્થળ પર દરોડો પાડ્યો હતો.
દરોડા દરમિયાન પોલીસે રાજદીપસિંહ ભીખુભા ઝાલા, મુકેશસિંહ હરીભા વાઘેલા અને મહેન્દ્રસિંહ વનરાજસિંહ વાઘેલા નામના ત્રણ શખ્સોને જુગાર રમતા ઝડપી પાડ્યા હતા. તેમની પાસેથી રોકડ રકમ,મોબાઈલ ફોન અને મોટર સાયકલ મળી આવ્યા હતા.
પોલીસે ઝડપાયેલા આરોપીઓ પાસેથી કુલ રૂ.૧૦૪૭૦ રોકડા, ત્રણ મોબાઈલ ફોન અને ત્રણ મોટરસાયકલ સહિત કુલ રૂ. ૯૦૪૭૦ નો મુદ્દામાલ જપ્ત કર્યો છે. થરા પોલીસે જુગાર અધિનિયમ હેઠળ ગુનો નોંધીને આ મામલે વધુ તપાસ હાથ ધરી છે.
