નિઠારી હત્યાકાંડ 2006:દેશને હચમચાવી દેનારા નિઠારી હત્યા કેસમાં મંગળવારે સુપ્રીમ કોર્ટે મોટો ચુકાદો આપ્યો છે. કોર્ટે આ કેસની છેલ્લી બાકી ટ્રાયલમાં આરોપી સુરેન્દ્ર કોલીને નિર્દોષ જાહેર કર્યો હતો, જેના કારણે હવે તે તમામ કેસમાંથી નિર્દોષ છુટ્યો છે. આ એ જ નિઠારી હત્યાકાંડ છે જેણે 2005-2006માં સમગ્ર દેશને ચોંકાવી દીધો હતો અને જેના પર આધારિત ફિલ્મ ‘સેક્ટર 36’ 2024માં રિલીઝ થઈ હતી.
મુખ્ય ન્યાયાધીશ બી.આર. ગવઈ, જસ્ટિસ સૂર્યકાન્ત અને જસ્ટિસ વિક્રમ નાથે ચુકાદો સંભળાવતા કહ્યું કે, “અરજીકર્તા આરોપોમાંથી નિર્દોષ છે. તેને તાત્કાલિક મુક્ત કરવામાં આવે.” કોલી દ્વારા દાખલ કરાયેલ ક્યુરેટિવ પિટિશન પર કોર્ટ આ નિર્ણયની સુનાવણી કરી રહી હતી, જેમાં તેણે 2011ના સુપ્રીમ કોર્ટના નિર્ણયને પડકાર્યો હતો જેમાં તેને 15 વર્ષની છોકરીની હત્યામાં દોષી ઠેરવવામાં આવ્યો હતો.
સર્વોચ્ચ અદાલતે જણાવ્યું હતું કે કોલી સામે દોષિત ઠરાવ માત્ર નિવેદન અને રસોડાના છરીની પુનઃપ્રાપ્તિ પર આધારિત છે, જેને શંકાથી પરના પુરાવા તરીકે ગણી શકાય નહીં. કોર્ટે કહ્યું કે ફરિયાદી પક્ષ એ સાબિત કરવામાં નિષ્ફળ ગયો કે ખરેખર ગુનો કોલી દ્વારા કરવામાં આવ્યો હતો.
નિઠારી કૌભાંડ ડિસેમ્બર 2006માં પ્રકાશમાં આવ્યું હતું જ્યારે નોઈડાના નિથારી ગામમાં વેપારી મોનિન્દર સિંહ પંઢેરના ઘરની પાછળના નાળામાંથી અનેક બાળકોના હાડપિંજર મળી આવ્યા હતા. આ ભયાનક ઘટસ્ફોટ બાદ પોલીસે પંઢેર અને તેના ઘરેલુ નોકર સુરેન્દ્ર કોલીની ધરપકડ કરી હતી.
સીબીઆઈએ આ કેસની તપાસ સંભાળી અને કોલી વિરુદ્ધ અનેક કેસ નોંધ્યા. જેમાં હત્યા, અપહરણ, બળાત્કાર અને પુરાવાનો નાશ કરવાના આરોપો સામેલ હતા. પંઢેર સામે અનૈતિક પ્રવૃતિઓ સંબંધિત કેસ પણ નોંધવામાં આવ્યો હતો.
2015 માં, અલ્હાબાદ હાઈકોર્ટે કોલીની મૃત્યુદંડની સજાને આજીવન કેદમાં ફેરવી દીધી, એમ કહીને કે તેની દયાની અરજીનો નિર્ણય કરવામાં અસાધારણ વિલંબ થયો હતો. આ પછી હાઈકોર્ટે કોલીને 12 કેસમાં અને પંઢેરને બે કેસમાં નિર્દોષ જાહેર કર્યા હતા.
સીબીઆઈ અને પીડિત પરિવારોએ આ નિર્દોષ છૂટના આદેશો સામે સુપ્રીમ કોર્ટમાં 14 અપીલો દાખલ કરી હતી, જેને સુપ્રીમ કોર્ટે 31 જુલાઈ, 2025ના રોજ ફગાવી દીધી હતી. હવે, સુપ્રીમ કોર્ટે કોલીને અંતિમ કેસમાં પણ નિર્દોષ જાહેર કર્યા બાદ, તેની મુક્તિનો માર્ગ મોકળો થઈ ગયો છે.
