બિહાર ચૂંટણી: કોંગ્રેસે શનિવારે બિહાર વિધાનસભા ચૂંટણી-2025 માટે તેના ઉમેદવારોની બીજી યાદી જાહેર કરી. આ યાદીમાં કુલ 5 ઉમેદવારોના નામ સામેલ છે. પાર્ટીએ નરકટિયાગંજ, કિશનગંજ, કસ્બા, પૂર્ણિયા અને ગયા શહેરની બેઠકો પરથી પોતાના ઉમેદવારોના નામ જાહેર કર્યા છે.
અગાઉ, કોંગ્રેસે 16 ઓક્ટોબરે 48 ઉમેદવારોની પ્રથમ યાદી જાહેર કરી હતી. બીજી યાદી જાહેર થતાં, પાર્ટીએ અત્યાર સુધીમાં કુલ 53 ઉમેદવારોના નામ જાહેર કર્યા છે. પ્રથમ યાદીમાં પ્રથમ અને બીજા તબક્કા માટે 24-24 ઉમેદવારોના નામની જાહેરાત કરવામાં આવી હતી.
કોંગ્રેસે બે યાદીઓ દ્વારા તેના ઉમેદવારો જાહેર કર્યા હોવા છતાં મહાગઠબંધન હેઠળ બેઠકોની વહેંચણીની સત્તાવાર જાહેરાત હજુ સુધી કરવામાં આવી નથી. મહાગઠબંધનમાં બેઠક અંગે હજુ પણ અસમંજસ પ્રવર્તી રહી છે, જેના કારણે મતદારો તેમજ મહાગઠબંધનમાં સમાવિષ્ટ પક્ષોના કાર્યકરો મુંઝવણમાં છે. બેઠક વહેંચણીની જાહેરાત ન થવાને કારણે ઉમેદવારો ખુલ્લેઆમ પ્રચાર કરી શકતા નથી.
બિહારમાં આ વખતે કુલ 243 વિધાનસભા બેઠકો માટે બે તબક્કામાં મતદાન થશે. પ્રથમ તબક્કા હેઠળ 6 નવેમ્બરે 121 બેઠકો પર મતદાન થશે, જ્યારે બીજા તબક્કા હેઠળ 11 નવેમ્બરે 122 બેઠકો પર મતદાન થશે. ચૂંટણીના પરિણામો 14 નવેમ્બરે જાહેર કરવામાં આવશે.
