ઉત્તર ગુજરાતના પાટણ જિલ્લામાંથી સાયબર ગુનાખોરી જગતના ઇતિહાસના સૌથી મોટા અને ચોંકાવનારા બ્રેકિંગ સમાચાર સામે આવી રહ્યા છે. ગુજરાત સરકારના ‘ઓપરેશન મ્યુલ હન્ટ ૨.૦’ (Operation Mule Hunt 2.0) અંતર્ગત પાટણ સાયબર ક્રાઈમ પોલીસે એક આંતરરાજ્ય કક્ષાના રૂપિયા ૩૯૮ કરોડના સાયબર ક્રાઈમ રેકેટનો પર્દાફાશ કર્યો છે. પોલીસે આ મેગા ઓપરેશનમાં કુલ ૧૪ રીઢા આરોપીઓની ધરપકડ કરી લીધી છે. બનાસકાંઠા રેન્જના આઈજી પરિક્ષીતા રાઠોડ અને પાટણ એસપી વી.કે.નાયીના આદેશ તેમજ DySP પરેશ રેણુકાના માર્ગદર્શન હેઠળ પોલીસે ભારત સરકારના SAMANVAYA અને NCCRP પોર્ટલના ડેટાનું એનાલિસિસ કર્યું હતું.
તપાસમાં સામે આવ્યું કે ધી હારીજ નાગરિક સહકારી બેંકમાં ખોલવામાં આવેલા ૧૩ કરંટ ખાતાઓમાં દેશભરમાંથી સાયબર ફ્રોડના કરોડો રૂપિયા ટ્રાન્સફર થઈ રહ્યા હતા. આ ગેંગના વચેટીયાઓ ગરીબ અને સામાન્ય લોકોને માસિક કમિશન અને રોકડની લાલચ આપી તેમના નામે બોગસ પેઢીઓ બનાવી બેંક ખાતા ખોલાવતા હતા. ત્યારબાદ તેમની પાસબુક, એટીએમ કાર્ડ, ચેકબુક અને નેટ બેંકિંગ કિટ પોતાના કબજે લઈ લેતા હતા. આ ખાતાઓનો ઉપયોગ ઓટીપી ફ્રોડ, ડિજિટલ અરેસ્ટ, સેક્સ્ટોર્શન અને ઓનલાઈન સટ્ટાબાજીના કાળા નાણાં ફેરવવા માટે થતો હતો. આ ૧૩ ખાતાઓમાંથી કુલ ૨૨૮ સાયબર ફ્રોડની ફરિયાદો આખા દેશમાં નોંધાઈ ચૂકી છે. પોલીસે આ મામલે ૨૦ આરોપીઓ વિરુદ્ધ ભારતીય ન્યાય સંહિતા (BNS) ની વિવિધ કલમો હેઠળ ગુનો નોંધી રોહન ઠાકોર, ચેતન ઠક્કર અને વિષ્ણુ પ્રજાપતિ સહિત ૧૪ લોકોને જેલના સળિયા પાછળ ધકેલી દીધા છે. જ્યારે આ રેકેટના મુખ્ય સૂત્રધારો પૈકીના અમદાવાદના જયદીપ ઉર્ફે જે.ડી. ઠક્કર, હર્ષદ ઠક્કર સહિત ૬ આરોપીઓને ઝડપી લેવા પોલીસે ચક્રો ગતિમાન કર્યા છે.
