PM મોદી અલ્બેનીઝને મળ્યા વડાપ્રધાન નરેન્દ્ર મોદી જી-20 સંમેલનમાં ભાગ લેવા માટે જોહાનિસબર્ગની મુલાકાતે છે. શુક્રવારે, તેઓ G-20 પરિષદની બાજુમાં ઓસ્ટ્રેલિયાના વડા પ્રધાન એન્થોની અલ્બેનિસને મળ્યા હતા. બંને નેતાઓએ છેલ્લા 5 વર્ષમાં ભારત અને ઓસ્ટ્રેલિયા વચ્ચેની વ્યાપક વ્યૂહાત્મક ભાગીદારી પર સંતોષ વ્યક્ત કર્યો હતો.
બેઠક દરમિયાન, ઓસ્ટ્રેલિયાના વડા પ્રધાન અલ્બેનિસે ભારતમાં તાજેતરમાં થયેલા આતંકવાદી હુમલા અંગે દુઃખ વ્યક્ત કર્યું હતું અને આતંકવાદ સામે એકતા વ્યક્ત કરી હતી. બંને નેતાઓએ આતંકવાદ સામે વૈશ્વિક લડાઈને વધુ મજબૂત કરવા માટે પ્રતિબદ્ધતા વ્યક્ત કરી હતી.
પીએમ મોદીએ તેમના એક્સ એકાઉન્ટ પર આ મીટિંગની માહિતી શેર કરી છે. જેમાં તેમણે જણાવ્યું હતું કે,
ઓસ્ટ્રેલિયાના પીએમ એન્થોની અલ્બેનીઝ સાથે ખૂબ સારી મુલાકાત થઈ. આ વર્ષે આપણા દેશોની વ્યૂહાત્મક ભાગીદારીના 5 વર્ષ પૂર્ણ થયા છે અને વર્ષો દરમિયાન અમારા સહયોગે દ્વિપક્ષીય સંબંધોને વધુ મજબૂત કરીને ઘણી પરિવર્તનકારી સિદ્ધિઓ હાંસલ કરી છે. આજની વાતચીતમાં મેં ત્રણ મુખ્ય ક્ષેત્રો પર વિશેષ ભાર મૂક્યો – સંરક્ષણ અને સુરક્ષા, પરમાણુ ઊર્જા અને વેપાર. આ ક્ષેત્રોમાં આપણા સંબંધોને વધુ આગળ વધારવાની અપાર સંભાવનાઓ છે. આ ઉપરાંત શિક્ષણ, સાંસ્કૃતિક આદાનપ્રદાન અને અન્ય વિષયો પર પણ વિગતવાર ચર્ચા કરવામાં આવી હતી.
બંને નેતાઓએ રાજકીય અને વ્યૂહાત્મક, સંરક્ષણ, સુરક્ષા, ટેકનોલોજી, શિક્ષણ, વેપાર, રોકાણ અને પરસ્પર સંબંધોના ક્ષેત્રોમાં દ્વિપક્ષીય સહયોગને વધુ મજબૂત કરવા ચર્ચા કરી હતી. બંને વડા પ્રધાનોએ પરસ્પર હિતના પ્રાદેશિક અને વૈશ્વિક મુદ્દાઓ પર પણ વિચારોનું આદાન-પ્રદાન કર્યું હતું. આ દરમિયાન ભારત અને ઓસ્ટ્રેલિયા વચ્ચે સતત વધતી જતી વ્યૂહાત્મક ભાગીદારીને વધુ આગળ લઈ જવા પર સહમતિ થઈ હતી.
આ પણ વાંચો- જોહાનિસબર્ગમાં 11 રાજ્યોના લોકનૃત્યો સાથે ‘રિધમ્સ ઓફ યુનાઈટેડ ઈન્ડિયા’ ગુંજ્યો, પીએમ મોદીએ સ્વાગત કર્યા બાદ કહ્યું- ‘ભારતની વિવિધતાનું આ અદ્ભુત પ્રદર્શન છે’
આ અંગે ઓસ્ટ્રેલિયાના વડાપ્રધાન એન્થોની અલ્બેનિસે સોશિયલ મીડિયા પ્લેટફોર્મ X પર લખ્યું છે કે ઓસ્ટ્રેલિયા અને ભારત ઘણા સારા મિત્રો અને ભાગીદાર છે. ઑસ્ટ્રેલિયા-ભારત સંબંધો વેપાર, સંરક્ષણ અને સુરક્ષાથી લઈને શિક્ષણ અને સ્વચ્છ ઊર્જા સુધી અત્યંત મહત્વપૂર્ણ છે. G20 સમિટ પહેલા મારા મિત્ર વડાપ્રધાન મોદીને મળવું ખૂબ જ સારું લાગ્યું.
