હૈદરાબાદ જઈ રહેલી ગલ્ફ એરની ફ્લાઈટમાં બોમ્બની ધમકી, પ્લેન મુંબઈમાં લેન્ડ થયું

બહેરીનથી હૈદરાબાદ આવી રહેલી ગલ્ફ એરની ફ્લાઈટમાં બોમ્બની ધમકી મળ્યા બાદ પ્લેનનું મુંબઈમાં ઈમરજન્સી લેન્ડિંગ કરવામાં આવ્યું હતું. ફ્લાઇટ GF274માં કુલ 154 મુસાફરો સવાર હતા. હૈદરાબાદ એરપોર્ટને રવિવારે સવારે લગભગ 3 વાગ્યે ઈમેલ દ્વારા માહિતી મળી હતી કે પ્લેનમાં બોમ્બ મૂકવામાં આવ્યો છે. માહિતી મળતાની સાથે જ સુરક્ષા એજન્સીઓ સક્રિય થઈ ગઈ હતી.

આ પ્લેન શનિવારે રાત્રે 10:20 કલાકે બહેરીનથી ઉડાન ભરી હતી અને રવિવારે સવારે 4:55 કલાકે હૈદરાબાદ પહોંચવાનું હતું, પરંતુ સુરક્ષાના કારણોસર તેને મુંબઈ તરફ વાળવામાં આવ્યું હતું.

સુરક્ષા તપાસ પૂર્ણ થયા બાદ પ્લેનને ટેક ઓફ કરવાની પરવાનગી આપવામાં આવી હતી અને તે સવારે 11:31 વાગ્યે હૈદરાબાદ પહોંચ્યું હતું. ગલ્ફ એર દ્વારા એક નિવેદન જારી કરીને કહેવામાં આવ્યું છે કે, “બહેરીનથી હૈદરાબાદની ફ્લાઈટ GF274 સુરક્ષા પ્રોટોકોલ મુજબ મુંબઈમાં લેન્ડ થઈ હતી. એરક્રાફ્ટ સુરક્ષિત રીતે ઉતર્યું હતું અને તમામ સુરક્ષા પ્રક્રિયાઓ પૂર્ણ કર્યા બાદ તેની મુસાફરી ચાલુ રાખી હતી.”

આ પહેલા હૈદરાબાદ એરપોર્ટ પર પણ આવી જ ધમકીઓ મળી ચુકી છે. જૂનમાં ફ્રેન્કફર્ટથી હૈદરાબાદ આવતી લુફ્થાન્સાની ફ્લાઈટને પણ બોમ્બની ધમકી મળતાં જર્મની પરત ફરવું પડ્યું હતું. આ જ મહિનામાં બેગમપેટ એરપોર્ટ પર બોમ્બની ખોટી ધમકી પણ મળી હતી. જો કે તપાસ બાદ તે નકલી હોવાનું જાણવા મળ્યું હતું. બેગમપેટ એરપોર્ટનો ઉપયોગ હાલમાં માત્ર ચાર્ટર્ડ અને મિલિટરી ફ્લાઈટ્સ માટે થાય છે.

આ પણ વાંચો: ‘સીમાઓ બદલાતી રહે છે’; રાજનાથ સિંહના નિવેદનથી પાકિસ્તાનમાં હલચલ મચી ગઈ; કહ્યું- માત્ર PoK જ નહીં સિંધ પણ અમારું છે