સાને તાકાઈચી જાપાન: જાપાનના કેન્દ્રીય રાજકારણમાં ભારે ઉથલપાથલ બાદ, સાને તાકાઈચીને જાપાનના વડાપ્રધાન તરીકે ચૂંટવામાં આવ્યા છે. જમણેરી વિચારધારામાંથી આવતા તાકાઈચી જાપાનના પ્રથમ મહિલા વડાપ્રધાન બન્યા છે. તેમણે જાપાનના પૂર્વ વડાપ્રધાન શિગેરુ ઈશિબાનું સ્થાન લીધું છે. ઇશિબાએ મંગળવારે સવારે તેમની કેબિનેટ સાથે રાજીનામું આપી દીધું હતું. તેઓ માત્ર 1 વર્ષ જ જાપાનના વડાપ્રધાન પદ પર રહી શક્યા.
તાકાઈચી વડાપ્રધાન બન્યા પછી, 26 વર્ષથી એલડીપી સાથે ગઠબંધનમાં રહેલી કોમેટો પાર્ટીએ શાસક લિબરલ ડેમોક્રેટિક પાર્ટી (એલડીપી) સાથેનું જોડાણ તોડી નાખ્યું છે. કોમોટો પાર્ટીને કેન્દ્રવાદી પાર્ટી માનવામાં આવે છે. જેને બૌદ્ધોનું સમર્થન છે.
થોડા દિવસો પહેલા જ LDPએ જાપાનના ભૂતપૂર્વ વડા પ્રધાન શિગેરુ ઈશિબાના સ્થાને તેના નેતા સાને તાકાઈચીને ચૂંટ્યા હતા. જે બાદ જ કોમોટો પાર્ટીએ એલડીપી સાથે ગઠબંધન તોડી નાખ્યું. જેના કારણે એલડીપીને નવા સહયોગીની શોધ કરવી પડી હતી.
કોમોટો પાર્ટીનું કહેવું છે કે તાકાઈચીની રાજનીતિ ખૂબ જ કટ્ટરપંથી છે અને તે ભ્રષ્ટાચાર જેવી બાબતો પર નરમ વલણ અપનાવે છે. જેના કારણે એલડીપી ચૂંટણીમાં સતત હારનો સામનો કરી રહી છે.
વાસ્તવમાં લિબરલ ડેમોક્રેટિક પાર્ટી અને કોમોટો પાર્ટી સાથે મળીને સરકાર ચલાવી રહ્યા હતા. કોમોટો પાર્ટીએ જોડાણ તોડવાને કારણે લિબરલ ડેમોક્રેટિક પાર્ટી લઘુમતીમાં આવી ગઈ હતી, પરંતુ જાપાનનો વિરોધ એકજૂથ થવામાં અને એલડીપીને સત્તામાંથી બહાર કરવામાં નિષ્ફળ ગયો હતો. તકનો લાભ લઈને, તાકાઈચીએ ‘ઈશિન નો કાઈ’ (જાપાન ઈનોવેશન પાર્ટી) સાથે હાથ મિલાવ્યા. જે અત્યંત રાઈટ પાર્ટી ગણાય છે. સોમવારે બંને પક્ષોએ જોડાણ કરાર પર હસ્તાક્ષર કર્યા. જેમાં બંનેએ ઘણા મોટા મુદ્દાઓ પર પોતાનું લક્ષ્ય નક્કી કર્યું હતું.
વડાપ્રધાન બન્યા બાદ તાકાઈચીને મોટા પડકારોનો સામનો કરવો પડશે. જેમાં અમેરિકી રાષ્ટ્રપતિ ટ્રમ્પ સાથેની વેપાર મંત્રણાથી લઈને વધતી મોંઘવારી સુધીની દરેક બાબતો સામેલ છે. જેને લઈને લોકોમાં ભારે અસંતોષ જોવા મળી રહ્યો છે. તેઓએ જલ્દી આનો ઉકેલ શોધવો પડશે.
વિદેશી સ્તરે તાકાઈચીની નીતિઓ જાપાનને મુશ્કેલીમાં મૂકી શકે છે. તાકાઈચી ચીન સાથેના સંબંધોને લઈને ખૂબ જ કડક વલણની વકીલાત કરી રહ્યા છે. જેના કારણે જાપાન અને ચીન વચ્ચેના સંબંધોમાં વધુ ખટાશ આવી શકે છે.
