SA20 લીગની ચોથી સિઝનની શરૂઆત કેપ ટાઉનના ન્યુલેન્ડ્સ મેદાન પર શાનદાર રીતે થઈ હતી. પ્રથમ મેચમાં, ડિફેન્ડિંગ ચેમ્પિયન MI કેપટાઉનનો સામનો ડરબન સુપર જાયન્ટ્સ સામે થયો હતો, જ્યાં ડરબનની ટીમે રોમાંચક વિજય મેળવ્યો હતો. આ મેચમાં ચાહકોને ચોગ્ગા અને છગ્ગાની ખૂબ જ રમઝટ જોવા મળી હતી અને બંને ટીમોએ મળીને મેચમાં 449 રન બનાવ્યા હતા, જે કોઈપણ SA20 મેચમાં રન બનાવવાનો બીજો સૌથી વધુ રેકોર્ડ છે. આ સમય દરમિયાન, MI કેપટાઉનના ઓપનર રેયાન રિકલટનના બેટમાંથી સિઝનની પ્રથમ સદી જોવા મળી હતી, પરંતુ તે ટીમને જીત તરફ લઈ જઈ શક્યો ન હતો.
ડરબન સુપર જાયન્ટ્સે બોર્ડ પર મોટો સ્કોર મૂક્યો
આ મેચમાં પ્રથમ બેટિંગ કરતા ડરબન સુપર જાયન્ટ્સે 20 ઓવરમાં 232 રનનો મજબૂત સ્કોર બનાવ્યો હતો. ડરબનની ઇનિંગ્સનો પાયો ડેવોન કોનવે અને કેન વિલિયમસનની 96 રનની ઓપનિંગ પાર્ટનરશિપ દ્વારા નંખાયો હતો. કોનવેએ 64 રન અને વિલિયમસને 40 રનનું યોગદાન આપ્યું હતું. આ પછી એડન માર્કરામે 35 રનની ઝડપી ઇનિંગ રમી, જેના કારણે ટીમનો સ્કોર ઝડપથી વધ્યો. હેનરિક ક્લાસેન, ઇવાન જોન્સ અને ડેવિડ વિઝે પણ ટૂંકી પરંતુ વિસ્ફોટક ઇનિંગ્સ રમી હતી. બીજી તરફ, એમઆઈ કેપટાઉન તરફથી જ્યોર્જ લિન્ડેએ સૌથી વધુ બે વિકેટ લીધી હતી.
રેયાન રિકલટનની સદી બરબાદ થઈ ગઈ
જવાબમાં, ડિફેન્ડિંગ ચેમ્પિયન MI કેપટાઉનની શરૂઆત સારી રહી ન હતી, વહેલી વિકેટ પડવાને કારણે દબાણ વધી ગયું હતું. રીઝા હેન્ડ્રીક્સ 28 રન બનાવીને આઉટ થયો હતો જ્યારે રાસી વાન ડેર ડુસેન માત્ર 2 રન બનાવી શક્યો હતો. તે જ સમયે નિકોલસ પુરન પણ 15 રન બનાવી પેવેલિયન પરત ફર્યો હતો. પરંતુ રેયાન રિકલટન એક છેડો પકડી રાખ્યો હતો. તેણે માત્ર 63 બોલમાં 113 રનની તોફાની ઇનિંગ રમી હતી, જેમાં 5 ફોર અને 11 સિક્સ સામેલ હતી. SA20માં એક ઇનિંગમાં આ સૌથી વધુ સિક્સર છે. રિકલટને જેસન સ્મિથ સાથે 76 રનની મહત્વપૂર્ણ ભાગીદારી પણ કરી હતી, જેમાં સ્મિથે 14 બોલમાં 41 રન બનાવ્યા હતા.
જોકે છેલ્લી ઓવરોમાં દબાણ વધી ગયું હતું. છેલ્લી બે ઓવરમાં માત્ર 15 રન થયા હતા અને ત્રણ વિકેટ પડી હતી. જેના કારણે MI કેપટાઉનની ટીમ 20 ઓવરમાં 7 વિકેટ ગુમાવીને માત્ર 217 રન બનાવી શકી અને 15 રનથી હારી ગઈ. ડરબનના યુવા બોલર એથન બોશે 4 વિકેટ લઈને મેચનો પલટો ફેરવી દીધો હતો અને ક્વેના માફાકાએ પણ છેલ્લી ઓવરોમાં ચુસ્ત બોલિંગ કરી હતી. જેના કારણે ગત સિઝનમાં પોઈન્ટ ટેબલમાં તળિયે રહેલી ડરબન સુપર જાયન્ટ્સની ટીમે આ વખતે જીત સાથે શરૂઆત કરી હતી.
