દિલ્હી બ્લાસ્ટ:દેશની રાજધાની દિલ્હીમાં લાલ કિલ્લા મેટ્રો સ્ટેશન પાસે સોમવારે સાંજે એક મોટી ઘટના બની હતી. જ્યાં લાલ કિલ્લા પાસે એક કારમાં વિસ્ફોટ થયો હતો. આ ઘટનામાં 12 લોકોએ જીવ ગુમાવ્યા અને 20થી વધુ લોકો ઘાયલ થયા. આ સમાચાર બાદ દિલ્હી અને જમ્મુ-કાશ્મીર વચ્ચે ચાલી રહેલી રણજી મેચને લઈને પણ સવાલો ઉભા થયા છે.
જો કે, આ અંગે અપડેટ આપતાં દિલ્હી એન્ડ ડિસ્ટ્રિક્ટ ક્રિકેટ એસોસિએશન (DDCA) એ સ્પષ્ટ કર્યું છે કે મેચ તેના સમયપત્રક મુજબ ચાલુ રહેશે, પરંતુ સાવચેતીના ભાગ રૂપે, અરુણ જેટલી સ્ટેડિયમ અને તેની આસપાસની સુરક્ષા વ્યવસ્થા અનેક ગણી વધારી દેવામાં આવી છે.
લાલ કિલ્લા પાસે થયેલા આ દુ:ખદ વિસ્ફોટમાં અનેક લોકોના મોત થયાના અહેવાલ છે, જે બાદ સમગ્ર દિલ્હીમાં હાઈ એલર્ટ જાહેર કરવામાં આવ્યું છે. અરુણ જેટલી સ્ટેડિયમ, જ્યાં રણજી ટ્રોફી ગ્રુપ-ડીની આ મહત્વપૂર્ણ મેચ રમાઈ રહી છે. આ સ્ટેડિયમ લાલ કિલ્લાથી થોડે દૂર છે.
DDCA સચિવ અશોક શર્માએ કહ્યું, “દિલ્હી અને જમ્મુ-કાશ્મીર વચ્ચેની રણજી ટ્રોફી મેચના અંતિમ દિવસે અરુણ જેટલી સ્ટેડિયમની આસપાસ સુરક્ષા વધારવામાં આવશે.” તેણે કહ્યું કે ખેલાડીઓ અને દર્શકોની સુરક્ષા તેના માટે સૌથી મહત્વની છે.
આ મેચમાં જમ્મુ-કાશ્મીરે દિલ્હીને 7 વિકેટે હરાવ્યું છે. દિલ્હીએ પ્રથમ દાવમાં 211 રન અને બીજા દાવમાં 277 રન બનાવ્યા હતા. જમ્મુ-કાશ્મીરે પ્રથમ દાવમાં 310 રન બનાવ્યા હતા. મહેમાન ટીમને જીતવા માટે 179 રનનો ટાર્ગેટ હતો. જે કાશ્મીરની ટીમે સરળતાથી હાંસલ કરી હતી. જમ્મુ-કાશ્મીરના બેટ્સમેન કામરાન ઈકબાલે 133 રનની અણનમ ઈનિંગ રમી હતી.
