મુંબઈ-અમદાવાદ હાઈવે:ગુરુવારે સવારથી મુંબઈ-અમદાવાદ નેશનલ હાઈવે પર વાહનવ્યવહાર સામાન્ય રીતે ચાલતો જોવા મળ્યો હતો. અગાઉ આ માર્ગ પર ચાર દિવસ સુધી વાહનોની લાંબી કતારો લાગી હતી. મુસાફરોએ સોશિયલ મીડિયા પર વીડિયો શેર કરીને કહ્યું કે તેઓ પાંચથી આઠ કલાક સુધી ફસાયેલા છે. ટ્રાફિક જામમાં ઘણી એમ્બ્યુલન્સને રોકવી પડી હતી, જ્યારે ઘણા મુસાફરો તેમની ફ્લાઇટ્સ અને ટ્રેન ચૂકી ગયા હતા.
આ અઠવાડિયે જામ માત્ર એક કામચલાઉ સમસ્યા ન હતી, તેણે NH-48ના જૂના અને નબળા ઈન્ફ્રાસ્ટ્રક્ચરને ફરી એક વાર ઉજાગર કર્યું છે.
થાણેના ગાયમુખ ઘાટ વિસ્તારમાં રોડ રિપેરિંગના કામને કારણે ત્રણ દિવસ સુધી ભારે વાહનો માટે રસ્તો બંધ રાખવામાં આવ્યો હતો. અધિકારીઓએ વૈકલ્પિક માર્ગો નક્કી કર્યા હતા, પરંતુ ઘણા ટ્રક ચાલકોએ તે સૂચનાઓનું પાલન કર્યું ન હતું. પરિણામે NH-48 પર વાહનોનો ઢગલો થઈ ગયો હતો અને સમગ્ર ટ્રાફિક વ્યવસ્થા ખોરવાઈ ગઈ હતી. સ્થાનિક લોકોના જણાવ્યા અનુસાર, ‘અમે દર થોડા મહિને આનો સામનો કરીએ છીએ. સમારકામ કે વરસાદના નામે રસ્તાઓ બંધ થઈ જાય છે અને અમારે કલાકો સુધી ફસાયેલા રહેવું પડે છે.
આ જામ કોઈ નવો મુદ્દો નથી. NH-48 છેલ્લા સાત-આઠ વર્ષથી સતત આ સમસ્યાનો સામનો કરી રહ્યું છે. વર્સોવા બ્રિજના સમારકામ અને નવા બ્રિજના નિર્માણ દરમિયાન આ માર્ગ લગભગ બે વર્ષ સુધી દરરોજ બંધ રહ્યો હતો. સરકારે 600 કરોડ રૂપિયા ખર્ચીને રોડને સિમેન્ટ-કોંક્રીટથી અપગ્રેડ કર્યો, પરંતુ ચોમાસું આવતાની સાથે જ ખાડા, ઉખડી ગયેલા રસ્તાઓ અને ટ્રાફિક જામની વાર્તા ફરી શરૂ થઈ જાય છે.
NH-48 એ મહારાષ્ટ્ર અને ગુજરાતને જોડતો મહત્વપૂર્ણ આર્થિક માર્ગ છે. તે મુંબઈ, થાણે અને પુણે જેવા મોટા ઔદ્યોગિક શહેરોમાંથી પસાર થાય છે. પરંતુ વિડંબના એ છે કે જ્યારે દેશના અન્ય ભાગોમાં નવા એક્સપ્રેસ વે અને ટનલ રેકોર્ડ સમયમાં બનાવવામાં આવી રહી છે, ત્યારે આ હાઇવે રોજિંદી મુશ્કેલીઓનું પ્રતીક બની ગયો છે.
