બેમેટરા: છત્તીસગઢના બેમેટારા શહેરમાં રવિવારે એક ઝડપભેર ડિફેન્ડર કારે રસ્તાઓ પર તબાહી મચાવી દીધી હતી. આ કારે એક પછી એક પાંચ વાહનોને ટક્કર મારી હતી. આ અકસ્માતમાં ત્રણ લોકોના મોત થયા હતા, જ્યારે પાંચ લોકો ઘાયલ થયા હતા. ઘાયલોને તાત્કાલિક જિલ્લા હોસ્પિટલમાં દાખલ કરવામાં આવ્યા હતા.
ત્યાં હાજર લોકોના જણાવ્યા અનુસાર, ડિફેન્ડર કાર એટલી સ્પીડમાં હતી કે તેણે બાઇક, સ્કૂટર અને પીકઅપને પણ છોડ્યું ન હતું. ટક્કર એટલી જોરદાર હતી કે પીકઅપમાં મુસાફરી કરી રહેલા એક યુવકનું ઘટનાસ્થળે જ મોત નીપજ્યું હતું. બાકીના સાત લોકોને ગંભીર હાલતમાં હોસ્પિટલમાં લઈ જવામાં આવ્યા હતા, જ્યાં અન્ય બેના મોત થયા હતા. અકસ્માત બાદ સમગ્ર શહેરમાં અરેરાટી ફેલાઈ ગઈ હતી.
ઘટના બાદ ગુસ્સે થયેલા લોકોએ આરોપી કાર માલિકના ઘરને ઘેરી લીધું હતું અને ભારે તોડફોડ કરી હતી. મળતી માહિતી મુજબ, આ ડિફેન્ડર કાર શહેરના કાપડના વેપારી બંટી મલક સિંહની છે. રોષે ભરાયેલા લોકોએ આક્ષેપ કર્યો હતો કે, શહેરમાં દરરોજ રસ્તાઓ પર હાઇસ્પીડ વાહનો દોડે છે અને પોલીસ કોઇ કાર્યવાહી કરતી નથી.
વધી રહેલા તણાવને જોઈને બેમેટારાના એસએસપી રામકૃષ્ણ સાહુ ઘટનાસ્થળે પહોંચ્યા અને લોકોને શાંત પાડ્યા. તેમણે ખાતરી આપી હતી કે દોષિતો સામે કડક કાર્યવાહી કરવામાં આવશે. હાલ પોલીસે કાર માલિકની અટકાયત કરી છે અને અકસ્માત સમયે કાર કોણ ચલાવી રહ્યું હતું તે જાણવાનો પ્રયાસ કરી રહી છે.
એસએસપી રામકૃષ્ણ સાહુએ કહ્યું કે પ્રારંભિક તપાસમાં એ સ્પષ્ટ નથી થયું કે ડ્રાઇવિંગ સીટ પર કોણ હતું. કાર માલિકની પૂછપરછ કરવામાં આવી રહી છે અને નજીકના લોકો પાસેથી પણ માહિતી લેવામાં આવી રહી છે. તેમણે કહ્યું કે પોલીસ તેના શ્રેષ્ઠ પ્રયાસો કરી રહી છે અને જે પણ દોષિત હશે તેને કોઈપણ કિંમતે છોડવામાં આવશે નહીં.
