શનિવારે ઇઝરાયલે ગાઝા પટ્ટી પર વધુ એક મોટો હુમલો કર્યો. પેલેસ્ટિનિયન આરોગ્ય અધિકારીઓએ જણાવ્યું હતું કે હવાઈ હુમલામાં ઓછામાં ઓછા છ લોકો માર્યા ગયા હતા, જેમાં બે બાળકો અને ન્યૂઝ ચેનલ અલ જઝીરાના કેમેરામેનનો સમાવેશ થાય છે.
પેલેસ્ટિનિયન આરોગ્ય મંત્રાલયના જણાવ્યા અનુસાર, શનિવારે સવારે 2 વાગ્યે ગાઝા શહેરમાં એક એપાર્ટમેન્ટને નિશાન બનાવ્યું હતું. આ હુમલામાં ઇમારતનો મોટો ભાગ કાટમાળમાં ફેરવાઈ ગયો હતો. ઘટનાસ્થળે હાજર પત્રકારોએ લોહીથી લથપથ કોંક્રિટના ટુકડા અને કાટમાળના ઢગલા જોયા હતા.4 વર્ષની ઝીના અને 14 વર્ષની લાના. બે માસૂમ છોકરીઓના મૃતદેહને શિફા હોસ્પિટલના શબઘરમાં મોકલવામાં આવ્યા હતા. તેમના પિતરાઈ ભાઈ મોહમ્મદ સફાદી, જેમને માથામાં ઈજા થઈ હતી, તેમણે કહ્યું, “હું ઘરે બેઠો હતો. રોકેટ કોઈપણ ચેતવણી વિના અમારા પર વાગ્યું.” તેમણે ઉમેર્યું કે તેમની પત્ની પણ ઘાયલ થઈ છે.
શનિવારે સાંજે, ઇઝરાયલી હુમલાઓમાં ચાર લોકો માર્યા ગયા અને ઓછામાં ઓછા એક ડઝન અન્ય ઘાયલ થયા. અલ-અક્સા હોસ્પિટલના જણાવ્યા અનુસાર, પહેલો હુમલો મધ્ય ગાઝામાં બુરેઇજ શરણાર્થી શિબિરમાં એક ઘર પર ચેતવણી વિના કરવામાં આવ્યો હતો, જેમાં અલ જઝીરાના કેમેરામેન અહેમદ વિશાહ સહિત ત્રણ લોકો માર્યા ગયા હતા. અલ જઝીરાએ વિશાહના મૃત્યુની પુષ્ટિ કરી છે. વિશાહના ભાઈ, મોહમ્મદ, જે અલ જઝીરાના રિપોર્ટર પણ છે, એપ્રિલમાં ઇઝરાયલી હુમલામાં માર્યા ગયા હતા.
