નવી દિલ્હીઃ આમ આદમી પાર્ટી (AAP) એ દિલ્હી મ્યુનિસિપલ કોર્પોરેશન (MCD)ની 12 બેઠકો પરની પેટાચૂંટણી માટે તેના ઉમેદવારોની યાદી જાહેર કરી છે. આ પેટાચૂંટણીઓ 30 નવેમ્બર 2025ના રોજ યોજાશે, જ્યારે મતગણતરી 3 ડિસેમ્બરે થશે.
પાર્ટી દ્વારા જાહેર કરવામાં આવેલી યાદી અનુસાર દક્ષિણ પુરીથી રામ સ્વરૂપ કનોજિયા, સંગમ વિહાર-એથી અનુજ શર્મા, ગ્રેટર કૈલાશથી ઈશના ગુપ્તા અને વિનોદ નગરથી ગીતા રાવત ચૂંટણી લડશે. આ સિવાય શાલીમાર બાગ-બીથી બબીતા અહલાવત, અશોક વિહારથી સીમા વિકાસ ગોયલ, ચાંદની ચોકથી હર્ષ શર્મા, દ્વારકાથી રાજબાલા સેહરાવત, મુંડકાથી અનિલ લાકરા અને નરૈનાથી રાજન અરોરાને ટિકિટ આપવામાં આવી છે.
પેટાચૂંટણી માટે નોમિનેશન માટેની છેલ્લી તારીખ 10 નવેમ્બર નક્કી કરવામાં આવી છે. આ ચૂંટણીને દિલ્હી વિધાનસભાની ચૂંટણી પછી ત્રણ પક્ષો – BJP, AAP અને કોંગ્રેસ માટે પ્રથમ મોટી રાજકીય કસોટી તરીકે ગણવામાં આવી રહી છે.
ઉલ્લેખનીય છે કે આ 12 વોર્ડમાંથી 9 વોર્ડ અગાઉ ભાજપના કાઉન્સિલરો અને 3 AAP કાઉન્સિલરો પાસે હતા. રેખા ગુપ્તા શાલીમાર બાગ-બી વોર્ડમાંથી વિધાનસભાની ચૂંટણી જીતીને મુખ્યમંત્રી બન્યા બાદ આ બેઠક ખાલી પડી હતી, જ્યારે દ્વારકા-બી વોર્ડ ભાજપના કમલજીત સેહરાવત સાંસદ બન્યા બાદ ખાલી પડી હતી. એ જ રીતે ફેબ્રુઆરીમાં યોજાયેલી વિધાનસભાની ચૂંટણીમાં પણ કેટલાક કાઉન્સિલરો ધારાસભ્ય બની જતાં અન્ય બેઠકો ખાલી પડી હતી.
