દરભંગા: બિહારના દરભંગામાં બુધવારે આયોજિત જનસભામાં કેન્દ્રીય ગૃહમંત્રી અમિત શાહે મોટો રાજકીય સંદેશ આપ્યો હતો. તેમણે કહ્યું કે દેશ અને બિહારમાં સત્તાને લઈને કોઈપણ પ્રકારની અટકળોને અવકાશ નથી. શાહે સ્પષ્ટ કહ્યું કે, ‘વડાપ્રધાન કે મુખ્ય પ્રધાનની કોઈ બેઠક ખાલી નથી. અહીં નીતિશ કુમાર છે અને નરેન્દ્ર મોદી છે. શાહના આ નિવેદનને વિરોધ પક્ષોમાં નેતૃત્વને લઈને ચાલી રહેલી અટકળો અને ચર્ચાઓનો સીધો જવાબ માનવામાં આવી રહ્યો છે.
અમિત શાહે કહ્યું કે વડાપ્રધાન નરેન્દ્ર મોદીએ પૂર્વ મુખ્યમંત્રી કર્પૂરી ઠાકુરને ભારત રત્ન આપવાનો નિર્ણય કરીને બિહારનું સન્માન વધાર્યું છે. કોંગ્રેસ અને લાલુ યાદવ પર નિશાન સાધતા તેમણે કહ્યું કે આ લોકોએ ક્યારેય કર્પૂરી ઠાકુરને તેમનું યોગ્ય સન્માન નથી આપ્યું.
શાહે પોતાના ભાષણમાં કહ્યું હતું કે પહેલગામ આતંકવાદી હુમલા બાદ વડા પ્રધાન મોદીએ ‘ઓપરેશન સિંદૂર’ ચલાવીને મજબૂત સંદેશો આપ્યો હતો. તેમણે એમ પણ જણાવ્યું કે કેન્દ્ર સરકારે પોપ્યુલર ફ્રન્ટ ઓફ ઈન્ડિયા એટલે કે PFI અને તેના સભ્યો પર પ્રતિબંધ મૂક્યો છે. એનડીએ માટે સમર્થન માગતા અમિત શાહે કહ્યું કે 6 નવેમ્બરે પ્રથમ તબક્કાનું મતદાન છે અને જનતાએ આ વખતે ‘ડબલ એન્જિન સરકાર’ને વધુ મજબૂત બનાવવાની છે.
તેમણે કહ્યું, ‘મિથિલાની પુત્રી મૈથિલી ઠાકુર દરભંગાથી ચૂંટણી લડી રહી છે, અને હું ખાતરી આપું છું કે તે જીતશે.’ શાહે લાલુ યાદવ પર પણ નિશાન સાધતા કહ્યું કે જનતાએ હવે તેમને સંપૂર્ણપણે નકારી દીધા છે. રામ મંદિરના નિર્માણનો ઉલ્લેખ કરતા શાહે કહ્યું, ‘ભગવાન રામ વર્ષો સુધી તંબુમાં રહેતા હતા, પરંતુ જ્યારે મોદીજી આવ્યા ત્યારે અયોધ્યામાં ભવ્ય મંદિર બનાવવામાં આવ્યું હતું. હવે સમય આવી ગયો છે કે મિથિલામાં માતા સીતાનું મંદિર બનાવવામાં આવે અને તેના તમામ સ્થળોને ‘રામ સર્કિટ’ સાથે જોડવામાં આવે.
શાહે સમસ્તીપુરમાં જાહેર સભામાં એમ પણ કહ્યું કે બિહારને નીતિશ કુમાર, ચિરાગ પાસવાન જેવા નેતાઓ મળ્યા છે અને વડાપ્રધાન મોદીના આશીર્વાદ તેમની સાથે છે. શાહે જનતાને અપીલ કરી હતી કે એનડીએએ બિહારની દરેક સીટ પ્રચંડ બહુમતી સાથે જીતવી જોઈએ.
